
ВИДЕО: МЗТ Скопје ја продолжува победничката серија во АБА2 лигата
Со докторска игра, перфектен шут и максимално користење на секоја противничка грешка, барем во најголемиот дел од средбата, кошаркарите на МЗТ Скопје Аеродром, вечерва, дојдоа до шестата победа во седмиот меч сезонава во АБА2 и тоа во пресметката со Ловќен (100:81).
Препорачано
Аеродромци демонстрираа квалитет и ги одушевија не само присутните во салата во Сараево, туку и сите што ја следеја средбата во регионот, покажувајќи карактер достоен за најдобриот македонски клуб изминатава деценија.
Победата беше обезбедена уште во првата четвртина, а клучната предност беше остварена заедно со прикажаното во третиот период со оглед што во овие 20 минути комбинирано „штрковите“ остварија „плус 26“ (67:41).
Дастин Вер одново беше моторот на „сино-белата“ машина, завршувајќи ја средбата со 19 поени, шест скока и четири асистенции, додека зад него беа Адем Мекиќ со 15 поени и по осум скока и асистенции, како и Роберт Рикиќ и Бојан Крстевски со по 11 поени.
Придонес дадоа сите, а за одбележување е храбрата и квалитетна игра на најмладите Дарио Митевски и Димитар Иванов, кои постигнаа седум односно четири поени.
Нашиот тим по турнирот во главниот град на Босна и Херцеговина останува второпласиран со скор 6:1, во пресрет на четвртиот „балон“ кон средината на јануари, каде што ќе ги одмери силите со Сутјеска, Подгорица и Војводина.
АБА2 лига
Недела, резултати –
Младост Земун – Рогашка 102:98
Сутјеска – Подгорица 73:65
МЗТ Скопје Аеродром – Ловќен Цетиње 100:81
Табела: Борац Бања Лука 14 бодови, МЗТ Скопје Аеродром 13, Младост Земун 12, Широки Бријег 12, Спарс Сараево 11, Хелиос Домжале 11, Сутјеска 11, Златобир Чајетина 11, Војводина Нови Сад 10, Ловќен Цетиње 10, Подгорица 9, Рогашка 8, Пелистер 8, Осиек 7.