Американската активистка Моника Левински се присети на својата сексуална афера со поранешниот американски претседател Бил Клинтон. Таа верува дека тој ја злоупотребил својата моќ.

Моника изјави дека во тоа време мислела дека е вљубена во Клинтон, но сега сфаќа дека била искористена.

„Тоа беше љубов на млада жена на возраст меѓу 22 и 24 години. Начинот на кој ја доживуваме љубовта еволуира со секоја врска што ја имаме. И јас го почувствував тоа. Имаше навестувања и многу други работи, но така го гледав тоа во тоа време. Мислам дека тоа беше и злоупотреба на моќта“, рече таа за време на појавувањето во поткастот „Како да не успеете“.

Веста за нивната сексуална афера стана јавна во 1998 година. Таа верува дека Белата куќа работела на промовирање на наративот дека таа е „глупава проститутка“.

За потсетување, таа за Си-ен-ен во 2021 година изјави дека однесувањето на Клинтон било апсолутно неприфатливо со оглед на тоа што тој бил „најмоќниот човек“, нејзин шеф и речиси 30 години постар од неа.