Во срцето на Шри Ланка се наоѓа градот Сигирија, изграден на Лавовската карпа висока 180 метри, на 360 метри надморска височина, а неговото имезначи „мала карпа“.

Поради своето софистицирано урбанистичко планирање, овој град сè уште е предмет на восхит на современите научници, пишува „Н1“.

Времето ги лекува раните, вели една позната поговорка. Но, времето води и до заборавање на некои работи, вклучувајќи ги и некогаш големите и моќни градови – што во овој случај се покажува како вистина. Оваа приказна е за еден таков град.

Градот Сигирија бил политички центар на Шри Ланка век и половина, а денес неговите добро сочувани остатоци се популарна туристичка атракција.

Изграден е во 5 век, за време на владеењето на кралот Касјапа, како тврдина во која се наоѓала кралската палата, водни градини, ботанички градини и будистички храм. Точно како таква структура била изградена на врвот на карпа во време без модерна технологија останува мистерија, а локалните легенди тврдат дека ја изградиле боговите како палата на небото.

Подоцна, ова место било населено од будистички монаси, сè додека и тие не се повлекле, а градот паднал во заборав помеѓу 1155 и 1831 година, и на крајот бил проголтан од џунглата.

Повторно го откриле европските истражувачи на почетокот на 19 век, а историчарите и археолозите неуморно работеле на неговото зачувување. Во 1982 година, бил вклучен во списокот на светско наследство на УНЕСКО, додека во 2009 година бил отворен Музејот Сигирија, опфаќајќи три децении археолошки истражувања.

Градот е оддалечен околу три часа возење од главниот град Коломбо и е отворен за туристи секој ден. По искачувањето на 1.250 скали, кои завршуваат со премин меѓу камени лавовски шепи, посетителите можат да поминат часови истражувајќи го овој фасцинантен споменик на архитектурата и градењето на една древна цивилизација.