И покрај тоа што изминатата година не беше најсреќна за струшкиот градоначалник Рамиз Мерко, тој денеска организираше голема прослава за 68-от роденден, на која присуствуваше целата општинска администрација. За прославата тој се пофали преку официјалната фејсбук-страница на Општина Струга. Таму се објавени фотографии и видеа од денешната свеченост, на која имаше аплаузи, подароци, коктел и специјална чоколадна торта со бројката 68.

Мерко пред речиси две години беше ставен на „црната листа“ на САД поради сомневања за корупција, а тој лани доби дополнителни кривични пријави за разни злоупотреби и неправилности во работењето како градоначалник. Претходно веќе беа отворени неколку судски процеси против него, а вкупно се водат 14 постапки. Мерко меѓу другото се гони и за набавката на луксузното службено „Ауди А6“, за незаконско поставување на директори во училиштата и за незаконско поставување спомен-плоча со балистичко обележје на влезот од општинската зграда.

Поголемиот дел од овие процеси привршуваат и за нив се очекуваат пресуди до јуни, а наесен се локалните избори, па денешниот коктел на Мерко и вработените во општината можеби е своевидна проштална забава на контроверзниот градоначалник за неговите соработници.