Пејачката Мараја Кери стана хит на социјалните мрежи благодарение на нејзината реакција на музичката посвета пред да ѝ биде врачена наградата „Икона“ (Icon) на доделувањето на наградите на „iHeartRadio“. Имено, кантавторите Муни Лонг и Тори Кели за време на церемонијата изведоа неколку хитови на пејачката од изминатите години, но Кери не покажа многу ентузијазам, пренесува „Дејли мејл“.

До Мараја седеше, пејачот Андерсон Паак, кој воодушевено уживаше во настапот. Иако имаше моменти кога Кери беше фатена на камерата со широка насмевка на лицето, таа полека избледе, а во еден момент додека Лонг ја пееше „We Belong Together“, камерата накратко ја покажа Кери како полека ја врти главата надесно, подалеку од сцената.

Моментот брзо стана вирален и се прошири низ социјалните мрежи, а некои веднаш предвидеа дека реакцијата на пејачката ќе стане нов мим.

„Ова ќе биде новиот мим, ви велам“; „Имам толку многу прашања…“, „На Марија Кери не ѝ се допаѓа овој настап и таа не го крие тоа“, „Марија гледа како луѓето ѝ ги уништуваат песните“, „Таа е таква дива“, напишаа корисниците на Икс.

Кери потоа ја прими нејзината награда и го започна својот говор со хумористично прашање до публиката: „Дали осветлувањето е добро? Не ми се допаѓа лошото осветлување…“ Таа потоа го претстави својот ансамбл и рече дека отсекогаш сонувала да ја слушаат на радио. „Дури и сега се возбудувам кога ќе слушнам една од моите песни на радио. Тоа никогаш не престанува да биде магично“, рече таа.

Пејачката посебно им се заблагодари на обожавателите и им оддаде почит на нејзината мајка, која почина минатата година во август. „На овој ден на Свети Патрик сакам да ѝ оддадам почит на мајка ми Патриша Кери што ми ја подари дарбата за музиката“, емотивно заклучила ѕвездата.