Вторпат оваа сезона екипата на Ливерпул во Премиер лигата успеа да оствари две победи во низа. „Редси“ вечерва на „Енфилд“ го совладаа Вест хем со 1:0, а единствениот гол го постигна Дарвин Нуњез, со глава по асистенцијата на Цимикас во 22 минута.

Нуњез можеше да запише уште еден погодок, но ја погоди стативата во 39 минута. Од друга страна, „чеканите“ можеа да стигнат до бод, но Бовен во 45 минута не реализираше пенал, односно Алисон добро прочита каде ќе шутира и го одбрани ударот за радост кај домашните навивачи.

Бразилскиот чувар на мрежата на Ливерпул уште еднаш се покажа како херој, во финишот од мечот успеа да излезе како победник и во дуелот со Соучек.

Челси не успеа да ја оправда фаворитската улога на гостувањето кај Брентфорд (0:0), додека Саутемптон со голот на Адамс во деветтата минута го совлада Бурнмаут.

Исто така и Њукасл минимално триумфираше над Евертон (1:0), стрелец на голот беше Алмирон во 31 минута на „Ст. Џејмс Парк“.