„За добро нека е“ е најновата песна во еден брз ска-ритам во кој не сме навикнати да ги гледаме „Меморија“. Песната е една од десетте песни кои ќе се најдат на новиот албум на групата „Уморни херои“. Автор на песната е новиот член на бендот, гитаристот Рубин Димкоски, а текстот е на Душко Темелковски, некогашниот пејач на прилепската група „Бен Хур“.

Заразен ритам кој влегува во уво, песна полна со позитива, како што рече Антонио Димитриевски, пи-ар на бендот, со певлив рефрен, а доколку обрнете повеќе внимание на целиот текст ќе сфатите дека испраќа моќна порака – и покрај сè, да се сака животот. Инспирацијата за создавање на композицијата е младото момче Филип Николовски од Прилеп, кој живее во инвалидска количка. Песната е стара две години и крие интересна приказна за тоа како ја добива оваа верзија.

– Оваа песна е напишана за една специјална личност, за еден мој голем фан. Се работи за момчето Филип Николовски. Тој има 25 години и се движи со помош на инвалидска количка, но ужива во секој момент со музика, многу сака да пее. Трбаше да направам песна за неговиот живот, тој и покрај тоа што живее во таква состојба многу го сака, ја сака музиката и дружбата. Кога ја предложив тука во бендот, на сите им се допадна и одлучивме да ја снимиме – рече Рубин Димкоски.

На секој концерт на „Меморија“ почесни гости се членовите на здружението „Мобилност“, кои се пред бината.

– Овојпат Филип, оваа песна што му е посветена нему, ќе ја пее со нас на сцена. Ако во догледно време се сними и спот, сигурно во него ќе биде и Филип. И тој ќе биде дел од нашата хумана мисија – додаде Димкоски.

Песната е снимена во студиото „Тра ла ла“ на Мите Димовски, кој заедно со Давор Јордановски стои зад музичката продукција, додека извршен продуцент е Петар Георгиевски – Камиказа.
Ристо Самарџиев раскажа дека кога ја слушнал песната сфатил дека ја знае од претходно и се сетил на емотивниот спот и мелодија.

– Јас ја слушав првата верзија на песната, што ја пее самиот Филип Никловски, уште пред Рубин да дојде во бендот, заедно со Рубин и со цела тајфа прилепски градски ликови. Снимен е интересен спот што неколкупати сме го пуштале на Сител телевизија, бидејќи носи убава, хумана порака. Всушност Филип е внук на познатиот македонски репрезентативен голман Јане Николовски. И ете се случи пред неколку месеци Рубин да ја донесе песната во бендот, а токму јас ја пејам новата верзија, со големо задоволство – откри Самарџиев.

„Меморија“ со полна пареа се подготвува за големиот концерт закажан за 16 ноември во СРЦ „Борис Трајковски“.

– Ова ќе биде нешто невидено за Македонија. Сакам да најавам дека ова ќе биде технички најопремен концерт во историјата на македонската популарна музика. Подготвуваме вистински спектакл – рече фронтменот на групата, Петар Георгиевски – Камиказа.

Камиказа откри уште неколку интерсни детали во врска со овој концертот.

– Четирите дами што ќе го украсат нашиот концерт се Ружица Брчиоска од групата „Ареа“, Андријана Јаневска, Дани Димитровска и Сара Мејс. Ќе имаме гајда, девојка на тапани, а кога почнав да откривам тајни, ќе ви откријам уште една. Песната „Оган под ѕвездите“ којашто ракометарите од македонската ракометна репрезентација ја пеат по секој натпревар во соблекувалната овој пат ќе ја пеат со нас на бината. Ќе се појават и моторџиите, а пејачките гостинки ќе го испеат хитот „Мотори“ на „Дивље јагоде“ – рече Камиказа.

„Меморија“ ја промовираше и песната „Мој народе“, која ќе се најде на албумот „Уморни херои“. Албумот е предвидено да излезе во февруари идната година.