При денешната посета на поплавените тетовски села Непроштено и Теарце „Слободен печат“, во целиот тој хаос на поплавени домови и уништена инфраструктура со камерата регистрираше и едно куче, кое беше заглавено во калта на спортскиот терен во Непроштено, каде освен кал имаше и големи наноси од камења и песок, кои вчера по силниот дожд и ерозивните процеси од Шара се спуштија во тетовските села.

Кучето е заглавено во калта, се бори со своите чекори да излезе оттаму. Неговата упорност сепак на крај победува и се искачува на блиската улица над спортскиот терен.

Мештаните од тетовските села Непроштено, Лешок и Теарце денеска ги пребројуваа, но и санираа штетите од синоќешното невреме, кое го зафати овој дел на тетовско.

Како што се гледа на видеото, има многу поплавени домови, оштетена пред се патна инфраструктура, а на улиците и другите јавни површини има кал до колена.

Постарите жители велат дека не паметат вакво невреме уште од 1963 година, кога Долни полог беше буквално под вода.

ВИДЕО+ФОТО: Пустош во тетовските села, поплавени домови, кал и камења до колена, уништена инфраструктура