Интер Мајами обезбеди место во полуфиналето од Лига Купот откако славеше над мексиканскиот Тигрес со 2-1, во натпревар во кој блесна Луис Суарез со два гола и двата од белата точка. Лео Меси и натаму е надвор од терените поради повреда.

Американскиот тим до водство стигна по 20 минути игра, кога судијата досуди пенал поради игра со рака на противнички фудбалер. Суарез беше прецизен за 1-0. Тигрес успеа да се врати во натпреварот во вториот дел со голот во 67. минута Кореа искористи грешка на одбраната на Интер Мајами и го израмни резултатот на 1-1.

Клучниот момент се случи во завршницата. Со помош на ВАР беше досуден нов пенал, повторно поради игра со рака на еден од играчите на Тигрес. Суарез и вторпат беше сигурен реализатор со што обезбеди победа за својот тим.

Беше блиску Тигрес да дојде до продолженија, но во големата прилика која ја имаа во завршницата беше погодена стативата.

Во полуфиналето Интер Мајами ќе се сретне со Орландо сити, кој во другиот четвртфинален дуел го елиминираше Толука со минимални 1-0.