Во деветтото коло од КОНКАКАФ квалификациите за пласман на Светското првенство победи забележаа Канада, САД и Мексико, а важен триумф имаше и Костарика против Панама.

Во Северна и Централна Америка нема многу дилеми. Единствено е всушност кој ќе биде четврти и кој од таа позиција ќе оди во бараж. Панама имаше шест бода повеќе пред мечот од деветтото коло против Костарика, но сега таа предност е преполовена.

Костарика победи со 1:0 на домашен терен, а единствен стрелец беше капитенот Брајан Руиз во 65. минута. Дотогаш Панама доминираше во поседот на топката и беше трпелива, но неколку удари на тој тим одбрани Кејлор Навас. Панама беше најблиску до израмнување во 75. минута кога повторно одбрани членот на ПСЖ.

Канада и натаму е прва и се чини дека ништо нема да ја спречи оваа селекција по вторпат да се најде на Мундијалот. За прв пат по Мексико во 1986 година. Канада поведе во Хондурас со автоголот на Малдонадо во 10 минута, а таа предност ја зголеми напаѓачот на Лил, Џонатан Дејвид во 73. минута за конечни 2:0.

Американците го совладаа Ел Салвадор со голот на Робинсон во 52. минута, а Мексико со пресврт триумфираше над Јамајка со 2:1. Најпрвин Јамајка поведе преку Џонсон, со играч помалку во 50. минута. Мексиканците израмнија преку Мартин во 81, а само 120 секунди подоцна Алексис Вега го постави конечниот епилог.

На табелата после девет кола води Канада со 19 бодови, пред САД (18), Мексико (17), Панама (14), Костарика (12), Јамајка (7), Ел Салвадор (6) и Хондурас (3).