Младите во државава најмногу се пронаоѓаат во ИТ сектор, здравство, право, а најмалку се заинтересирани за производство, занаетчиство и заштита на животна средина.

УСАИД – Американска агенција за меѓународен развој спроведе „Активност за млади кои активно создаваат можности“-истражување кое покажа дека две третини од испитаниците се пријавиле дека сакаат да станат претприемачи и сакаат да отворат свој бизнис.

Небојша Мојсоски, раководител на активноста на УСАИД за млади кои активно создаваат можности и Ивана Китановиќ, координаторка за медиуми, содржини и известување. Во утринската емисија „Слободен печат“ на Слободна ТВ велат дека анкетата е спроведена од млади за млади.

– Направено е испитување кај 2.167 млади лица, а целта е да им се даде можност на младите да ги развијат вештините во многу полиња и да бидат граѓански активни во нивните заедници. Во таа насока опфатени се лица на возраст од 15 до 19 години. Истражувањето е спроведено со МТСП и Агенција за вработување и треба да послужат во насока да дадат идни интервенции кои би ги спровеле и имплементирале-вели Китановиќ.

Мојсоски вели дека мора да се потенцира дека истражувањето е за млади од млади. Тој вели за младите најпопуларни кариерни аспирации се ИТ-сферата, како и здравството, правото и политиката, нагласувајќи ја потребата од приспособени мерки.

– Од друга страна не сакаат да работат во наука, заштита на животна средина, занаетчиство и производство. Развојот на вештините е од клучно значење, со забележлива желба кај испитаниците да ги подобрат комуникацијата, решавањето проблеми и креативноста. Практикантството е најпосакувана мерка за вработување и за стекнување нови вештини. Истражувањето го нагласува недостатокот на услугите за кариерно насочување, особено кај невработените млади-вели Мојсоски.

Китановиќ вели дека мнозинството кое го испитале не работат она за што се образувале. Повеќе од 80 отсто изразиле желба да ги надополнат своите вештини.

– Истражувањето покажува неповрзаност помеѓу областите на студирање на младите и нивните вистински работни улоги, при што повеќе од половина од вработените испитаници работат на позиции што не се поврзани со нивното формално образование. И покрај ова, усогласувањето помеѓу образованието и професијата, заедно со личниот интерес, значително влијаат при изборот на кариера. Исто така, младите изразуваат претпочитање за промена на работните места, првенствено поради финансискиот надоместок, но и други работни услови-вели Китановиќ.

Таа објаснува дека младите сакаат да ја подобрат комуникацијата, решавањето проблеми и креативноста.

– Практикантството е најпосакувана мерка за вработување и за стекнување нови вештини. Истражувањето го нагласува недостатокот на услугите за кариерно насочување, особено кај невработените млади, нагласувајќи ја потребата од подобрени информативни кампањи, особено во средното образование-вели Мојсоски.

Според него фали пракса, она што го имаат научено младите во формалното образование да се примени. Со дуалното образование се подготвени да влезат во производен процес.

– Веќе сме во фаза на УКИМ да се отвори кариерен центар. Најпосакувана форма на кариерно советување е персонализираното советување. Тука сите млади ќе можат дирекно да се информираат-вели Мојсоски.

Според истражувањето значајна неусогласеност се покажува помеѓу формалното образование и пазарот на труд. Тренд што преовладува кај младите се честите промени на работните места, како што е потврдено од страна на 71,8% од учесниците, кои биле на нивните сегашни работни места не повеќе од три години. Финансиските стимулации се доминантниот мотиватор при изборот на кариера. Исто така праксата која се плаќа како мерка е преферираниот метод за помош на младите при вработување. И покрај зголемената важност на дигиталната писменост, значителен дел од младите (60,5%) не се запознаени со е-бизнисот, што укажува на јаз во формалното образование.

Целото интервју погледнете го во продолжение: