Фудбалерите на Интер Мајами и Ал Ахли одиграа нерешено без голови во првото коло од Групата А на Светското клупско првенство што се организира во САД.

Играчите на Ал Ахли од Египет беа подобриот противник во првото полувреме, но голманот на Интер Мајами, Оскар Устари, неколку пати го спаси својот тим со одлични интервенции. Устари, исто така, одбрани пенал од играчот на Ал Ахли, Трезеге, во 43 минута.

Американскиот клуб Интер Мајами играше поангажирано во второто полувреме, со неколку пропуштени шанси за победа преку Тадео Аљенде, Лионел Меси и Фафа Пико.

Мечот се одигра на стадионот „Хард Рок“ во Мајами пред нешто помалку од 61.000 навивачи.

Во вториот дуел од првото коло од Групата А ќе се сретнат Палмеирас (Бразил) и Порто (Португалија) во ноќта помеѓу недела и понеделник.