Градоначалникот Горан Герасимовски синоќа заедно со општинските хигиеничари учествуваше во чистење на натрупаниот отпад околу контејнерите на неколку локации во Центар.

– Да не дозволиме сето она што не го прави комуналното претпријатие (ЈП „Комунална хигиена“) и неговата негрижа да остане проблем на граѓаните, ние сме тука за да ги решаваме проблемите заедно. А сега продолжуваме сите заедно да го чистиме Центар поради негрижата на градот – изјави Герасимовски на терен.

Тој посочи дека акцијата продолжува динамично за да се нормализира состојбата што побргу.

– Продолжуваме на следна локација, вечерва колку што ќе стигнеме да исчистиме, да ги наполниме контејнерите. Утрото продолжуваме, заедно со хигиеничарите, да ги средуваме другите населби, една по една. Сите контејнери се полни, и на булеварите. Центарци нема каде да се паркираат, и паркинг местата ги узурпирале со смет. Се надевам дека градската власт ќе се свести и од утре ќе си ги преземе одговорностите и ќе ни го направи градот почист. Ако тие не го направат тоа, нашите служби повторно ќе ја завршат работата на Градот – додаде Герасимовски.

Општина Центар информира дека општинските хигиеничари и во текот на денешниот ден продолжуваат со расчистување на сметот во сите населби.

ФОТО | Скопје длабоко „тоне“ во ѓубре – граѓаните нервозни, улиците смрдливи, отпадот несобран