Денеска репрезентацијата на Франција во полуфиналето ја оствари можеби најлесната победа на Европското првенство откако ја совлада Полска со огромни 95:54 на паркетот во Берлин.

Полјаците кои во четвртфиналето го елиминираа европскиот шампион Словенија немаа сили за ново изненадување на континенталниот собир, па в недела ќе играат за бронзениот медал против поразениот од второто полуфинале помеѓу Шпанија и Германија.

Веќе на почетокот на последната четвртија беше јасно дека Франција ќе оди во финалето, имаше високи 67:36 на девет минути до крајот. Неверојатно звучи информацијата дека во тој момент „триколорите“ имаа вкупен индекс на корисност 105, а Полјаците 18.

Очигледно истрошени, Полјаците уште од стартот се мачеа да постигнат кош, нивната прва ѕвезда Понитка беше запрен, исто како и Слотер, другите беа дури и под нивното ниво, за избраниците на Игор Миличиќ апсолутно ништо не им одеше како што треба на овој меч.

Јабуселе во победничките редови беше најефикасен со 22 поени, следен од Фурние и Окобо кои постигна по 10, а на спротивната страна Михалак и Слотер запишаа по девет коша, Понитка имаше седум.

Франција по четврти пат во својата историја ќе игра финале на европските шампионати, пред девет години го освои до сега единственото злато. Полска ќе ја брка четвртата бронза, беше третопласирана во 1939, 1965 и 1967 година.