Момчето кое на пошироката јавност ѝ стана познато по учеството во талент-шоуто „Македонски идол“ во 2011 година, каде што заврши во топ 4 и беше еден од фаворитите на публиката, оттогаш незапирливо ја трасира својата музичка кариера.

 

View this post on Instagram

 

A post shared by Viktor Apostolovski (VA) (@professor_va)

Виктор Апостоловски е пејач/автор/мулти-инструменталист од Битола, а во последните десет години издал над 50 песни, два албуми на македонски јазик и еден албум со колеги од САД, како и безброј настапи и соработки низ светот. Неговата деби песна „You were mine“ во 2011 година се пласираше во топ 20 на „Ем-ти-ви Адриа“, во 2020 доби награда на „Макфест“ за најдобар сценски настап, а последната песна „Mine“ беше второнаградена на меѓународен натпревар за музика и продукција.

Виктор сега е дел од „златната“ шесторка кој е во трка да стане македонски претставник на Евровизија во Торино, Италија. Од вкупно пристигнатите нумери, шест влегоа во финале и за нив ќе се гласа до 4 февруари, по што ќе се знае кој ќе ја претставува нашата земја на Евросонгот.

Виктор се претстави со песната „Супермен“, а првите впечатоци се брза, модерна, впечатлива и певлива. „Супермен“ супериорно влегува во уво. Музиката и аранжанот ги напиша Владимир Дојчиновски – Дојчин. Текстот е заедничко дело на Апостоловски и Дојчиновски.

– Иако текстот асоцира на јунакот од стриповите и филмовите, во овој случај „Супермен“ е парадигма на моето секојдневно битисување. Во ова време на пандемија, несигурност, тага, исчекување, ограничено движење и дружба, на мигови треба да имаш надчовечка сила да го издржиш сето тоа. И покрај сѐ, успеав да останам позитивен. Благодарен сум „што можам да одам, можам да зборувам, можам да ја исполнам твојата желба, можам да скокнам во огнот, можам да се шегувам“ како што пеам во песната. Имам сила да се борам против сите неправди не само во приватниот туку и во професионалниот живот. Пандемијата едноставно ни ги скрати крилата, особено на луѓето од музиката, уметноста – вели Апостоловски, и е среќен што е дел од шестте евровизиски кандидати.

Пејачот се надева дека публиката ќе ја препознае песната.

– Уште од дете ја следам Евровизија. Да бидам искрен, изминативе години имав голема желба да бидам македонски претставник на изборот. Таа можност сега ја имам. Верувам во „Супермен“ зашто е модерна, вечатлива и со заразен ритам. Ми легна уште од прво слушање. Уживав додека ја снимав. А, кога се пее со душа и со љубов, тоа не останува незабележано од публиката – истакнува Апостоловски.

Разговор со Андреа во пресрет на Евровизија: Кога веруваш во себе и својата песна, тоа е доволно!