Веќе неколку дена булеварите и улиците во Тетово особено во попладневните часови се речиси нефункционални. Со доаѓањето на печалбарите, пред новогодишните празници драстично се зголеми бројот на возила низ сообраќајниците, кои се во целосен колапс.

„ Сега пред Нова година, но и за време на летниот период кога доаѓаат печалбарите, во Тетово секаде пешки побрзо ќе стигнеш отколку со возило, затоа и јас одам пешки. Со автомобил сигурно ќе заглавиш некаде. Премногу возила има на улиците каде има и паркирани возила, а не памтам кога се отворила некоја нова улица во градот, за да се растерети сообраќајот. Градот веќе стана центар на целиот полошки регион, но со иста и дотраена сообраќајна инфраструктура. Воведоа градски превоз, но бадијала кога автобусот не може да вози со нормален проток, појди, застани работава е“, вели еден пешак од Тетово.

Од СВР Тетово, велат дека нивни екипи се на терен.

„Како и секогаш пред новогодишните празници имаме засилени полициски контроли на терен со поголемо присуство на полициски службеници со цел регулирање на сообраќајот и подобар проток. Тука се и нашите екипи на терен и доколку има некоја сообраќајка во тие гужви веднаш да интеревенираат, за да не дојде до поголем застој на сообраќајот“, велат за „Слободен печат“ од СВР Тетово.

Во Тетово засега нема никакви активности за изградба на обиколница што драстично би ја намалила фрекфенцијата на возила кои претежно градот го користат како транзит, од една до друга рурална општина од полошкиот регион.

Нови улици не се градат, а неодамна општината започна со пробивање на булеварот Благоја Тоска по две децении чекање. Но, оваа делница нема да се пробие целосно, туку од мостот кај Клиничката болница Тетово се до Средното текстилно училиште. Втората фаза од пробивањето на булеварот најверојатно ќе почека.

Фото: Слободен печат