Во третиот натпревар од финалниот плеј-оф во руската ВТБ лига составот на Уникс Казан минимално со 81:82 триумфираше над Локомотив Кубан.

При водство на Локомотив Кубан од 81:80, во последниот напад на Уникс Казан победничките поени ги реализираше Американецот Маркос Најт по асистенцијата на Ненад Димитријевиќ.

Повторно блескаше македонскиот репрезентативец Димитријевиќ кој беше втор стрелец во победата со 13 поени, четири скока и шест асистенции за 30 и пол минути игра на паркетот.

Поефикасен од нашиот играч беше само Дерил Мејкон 14 поени (четири асистенции), а на спротивната страна доминираше Џејлен Барфорд со 20 поени (шест скока, четири асистенции), три повеќе од Крис Хортон (шест скока).

Следниот четврти меч, кога повторно ќе биде домаќин Локомотив Кубан, ќе се игра за два дена на 13 мај.