Двајца пријатели планирале забавно патување со едрење од Њу Џерси до Флорида Кис, кога работите тргнале наопаку. Џо ДиТомасо (76) и Кевин Хајд (65) го напуштиле Орегон Инлет на 3 декември и набрзо изгубиле контакт со своето семејство. Им снемало гориво и струја и повеќе од десет дена пловеле среде Атлантски Океан.

Тие биле спасени дури во вторникот. Пудлицата Мини била на бродот со нив. Тие биле забележани од екипажот на еден танкер на околу 340 километри од брегот на Делавер, објави американската крајбрежна стража, цитирана од „Њујорк Тајмс“.

„Чудо е што воопшто нѐ најдоа. Дотогаш веќе бевме надвор од бродските рути. Тоа беше веројатно последниот брод што можеше да не забележи“, рече Хајд во средата навечер.

Крајбрежната стража започна потрага во неделата. Мажите биле на едрилица долга 9 метри. Останале без гориво и струја, поради што не им работело радиото и навигацијата. Искинат им бил и еден јарбол. Хајд за медиумите изјави дека јарболот се скршил откако ги погодило силно невреме со бранови ид речиси 12 метри.

„Никогаш во животот не сум доживеал толку силен ветер. Звучеше како самиот ѓавол да е надвор. По некое време бевме без вода и со многу малку храна. Цицавме вода од цевките. Сечевме цевки само за да добиеме малку вода“, рече ДиТомасо.

Екипажот на танкерот ги префрлил мажите и кучето на бродот, каде што биле прегледани од лекар. ДиТомасо изјави дека повеќе нема да плови од Њу Џерси до Флорида и дека ќе остане поблиску до брегот.