Уште еден македонски фудбалер ќе игра во шкотската Премиер лига, Давид Бабунски е промовиран како нов играч на Данди јунајтед.

Неодамна за овој клуб потпиша и Кристијан Трапановски кој веќе има настапи и реализираше погодок на дебито.

Од претходно се знае дека Бојан Миовски ги брани боите на Абердин, додека Давор Здравковски е дел од Мадервел.

Бабунски потпиша договор на една година со Данди, со опција истиот да биде продолжен на уште една година.

Играчот од средниот ред го започна своето фудбалско патување со најпрестижната академија во светот – Ла Масија од ФК Барселона. Играше за Б тимот на Барселона, играше и за Црвена звезда, Јокохама Ф. Маринос, Омија Ардија, Ботошани, Вииторул Констанца, Дебрецен и Мезоковешд.

– Ќе биде голем предизвик за мене – очекувањата за оваа сезона се големи, како што треба, и мораме да веруваме дека можеме да направиме нешто посебно – рече Бабунски за клупскиот сајт.