Откако одекна веста дека во југозападна Србија, поточно во Рашка е откриена масовна гробница, на социјалните мрежи се споделува видео во кое претседателот на српскиот парламент, Ивица Дачиќ им се чуди на Србите што ги откриваат локациите на масовните гробници со Албанци и Хрвати.

„Што ќе правиме со Србите кои им поткажуваат на Хрватите и на Албанците, кои зборуваат разни глупости. Кои кажуваат каде се погребани Албанците ширум Србија“ вели Дачиќ во емисијата „Кирилица“ која се емитува на телевизијата Хепи.

По состанокот на комисиите за исчезнати лица на Србија и Хрватска на 23 октомври во Белград, во Србија наскоро ќе се отворат три локации во потрага по исчезнати лица во војната во поранешна Југославија.

Тогаш и двете страни најавија дека заеднички ќе се обидат да ја расветлат судбината на 1.869 исчезнати граѓани на Хрватска преку теренски претреси и архивски истражувања.

„Тоа е список на исчезнати лица, кој вклучува потрага по лица за кои се знае дека се исчезнати или убиени, но не е познато каде се нивните тела“, изјави тогаш претседателот на Комисијата за притворени и исчезнати лица на хрватската влада, Стјепан Сучиќ.

Според податоците на Меѓународна комисија за исчезнати лица до крајот на косовскиот конфликт во јуни 1999 година, беше проценето дека се исчезнати од 4.400 до 4.500 лица. Од нив, до сега не се пронајдени уште 1.700.

Меѓународната комисија за исчезнати лица собра 97 проценти од семејните референтни примероци на ДНК потребни за да се помогне во процесот на идентификација; сепак, во повеќе од 1.700 случаи, вклучувајќи приближно 400 случаи во мртовечницата во Приштина, комисијата не успеа да направи ДНК совпаѓања.

Во 2010 година, комисијата издаде извештај во кој ги повика локалните и меѓународните власти одговорни за ова прашање на Косово да ги преземат сите неопходни чекори за решавање на проблемот со исчезнатите лица на Косово.

Пред српското правосудство досега никој не одговарал за операцијата на прикривање, но Меѓународниот кривичен трибунал за поранешна Југославија (МКТЈ) го осуди генералот на српската полиција, Властимир Ѓорѓевиќ, за учество во прикривањето на телата и во други воени злосторства над косовските Албанци.

Вчера започна првата статусна конференција пред Специјализираните комори на Косово во Хаг во судскиот процес против поранешните припадници на Ослободителната војска на Косово (ОВК), Хашим Тачи, Кадри Весели, Јакуп Красниќи и Реџеп Селими. Тие се обвинети за воени злосторства и против човештвото.

ВО ЖИВО: Почна статусната конференција за лидерите на ОВК, обвинението има над 40 илјади страни

Откриена масовна гробница кај Рашка, Србија со петнаесет до седумнаесет тела