Австралијката Бриџит Грок од Перт неодамна го прослави својот 110 роденден, а сега ја откри тајната на нејзината долговечност.

Бриџит е родена на 18 ноември 1914 година. Таа беше едно од седумте деца во семејството, а поради работата на татко ѝ како машиновозач, тие често се селеле. Кога се родила Бриџит, започнала Првата светска војна, а нејзината мајка се грижела за семејството со едната рака бидејќи другата ја изгубила во несреќа.

Таа откри дека, покрај вежбањето и здравата исхрана, нејзината тајна за долг живот е и пивото. Имено, таа во последните 60 години секој ден го пие истиот пијалок, пивото „Ему Експорт“ кое содржи 4,2 отсто алкохол и е едно од најпопуларните пива во Австралија.

„Да има куп пиво пред мене и некој да ме праша кое ми е омилено, секогаш би го издвоила Ему“, рекла оваа симпатична баба, пренесува „LADbible“.

На прашањето каков вкус има нејзиниот утрински пијалак, Бриџит без размислување одговорила: „На пиво!“

Таа тврди дека секое утро пие по една лименка од ова пиво, но смета дека за нејзината долговечност е заслужно и нешто друго:

„Мислам дека ако си добар со нив, луѓето ќе бидат добри со тебе“, изјавила таа.

Нејзината ќерка Јан Робертсон изјави дека нејзината мајка има одлична смисла за хумор и позитивен пристап кон животот и дека тоа ѝ помогнало да остане млада во срцето и покрај нејзината возраст.

Иако има 110 години, Бриџит не е најстарата Австралијка на светот. Пет месеци постара од неа е Лорна Хенстриџ од Бордертаун, која рече дека за нејзината долговечност е заслужно вежбањето и добрите гени.

Најстарата личност на целиот свет е Томико Итока, која има 116 години и живее во старечки дом во Јапонија.