ВИДЕО | Атанасов: Клучно за нашата победа беше одбраната во второто полувреме
Македонскиот кошаркарски шампион МЗТ Скопје Аеродром беше подобар од Борац од Бања Лука (67:61) и победнички го заврши настапот на АБА2 турнирот во Златибор.
Препорачано
Екипата од Аеродром против босанскиот претставник имаше две одлични четвртини, првата и третата, на крајот доволно за трета победа во пет одиграни кола од регионалното натпреварување.
Моментно на табелата водат Широки Бријег и Суботица со по девет бодови, следуваат МЗТ Скопје Аеродром и Подгорица со по седум.
– Клучно за нашата победа беше одбраната во второто полувреме, особено во третата четвртина во која стигнувавме до лесни поени. Не можам да кажам дека игравме добра одбрана во првото полувреме. Победа си е победа, за нас добар крај на овој „балон“, и се надевам само дека така ќе продолжиме – рече тренерот на МЗТ Скопје Аеродром, Васко Атанасов по завршувањето на мечот против Борац Бања Лука.
Од останатите македонски претставници во АБА2 лигата, в недела од 15.00 часот, ТФТ Моцарт ќе игра против словенечкиот Хелиос од Домжале, а три часа подоцна битолски Пелистер за противник ќе го има домаќинот на овој турнир, екипата на Златибор.
