Астронаутите на НАСА, Буч Вилмор и Сани Вилијамс рано утринава ја напуштија Меѓународната вселенска станица (ISS) во капсулата „Драгон Спејс Икс“, започнувајќи го своето 17-часовно враќање на Земјата по деветмесечен престој кој беше „значително подолг од планираниот“, пренесува „Гардијан“.

All the hugs. ?

The hatch of the SpaceX Dragon spacecraft opened March 16 at 1:35 a.m. ET and the members of Crew-10 entered the @Space_Station with the rest of their excited Expedition 72 crew. pic.twitter.com/mnUddqPqfr

— NASA’s Johnson Space Center (@NASA_Johnson) March 16, 2025

Нивната мисија на Меѓународната вселенска станица, која првично беше планирано да трае околу една недела, беше продолжена поради технички проблеми со вселенското летало Боинг Старлајнер.

Се очекува астронаутите да слетаат во водата во близина на брегот на Флорида подоцна денеска, во 17:57 часот по локално време.

Вилмор и Вилијамс отидоа на вселенската станица во јуни минатата година како прв екипаж на вселенското летало Боинг Старлајнер како дел од осумдневната пробна мисија.

Меѓутоа, проблемите со погонскиот систем на вселенското летало доведоа до неколкумесечни одложувања, поради што НАСА одлучи да ги врати на Земјата во капсула Спејс Икс како дел од редовна ротација на екипажот.

По слетувањето, астронаутите ќе бидат префрлени во вселенскиот центар Џонсон во Хјустон, каде што ќе бидат подложени на медицински прегледи пред да им биде дозволено да се вратат кај своите семејства.

Експертите објаснуваат дека долгиот престој во вселената може да има физички последици, вклучувајќи мускулна атрофија и можни проблеми со видот.

Вилмор и Вилијамс поминаа вкупно 286 дена во вселената, подолго од вообичаените шест месеци за мисиите на Меѓународната вселенска станица, но пократко од американскиот рекорд поставен од Френк Рубио, кој помина 371 ден во вселената поради дефект на руско летало.

Вилијамс ќе ја заврши својата трета вселенска мисија со вкупно 608 дена во вселената, што е второ најдолго време меѓу американските астронаути, зад Пеги Витсон, која поминала вкупно 675 дена во вселената.

НАСА соопшти дека Вилмор и Вилијамс морале да останат на Меѓународната вселенска станица додека не пристигне нивната замена за да го задржат потребниот број американски астронаути на станицата.

Астронаутите кои ќе ги заменат, четиричлениот екипаж на мисијата „Crew-10“, пристигнаа во петокот вечерта, со што бројот на членови на екипажот на Меѓународната вселенска станица привремено се зголеми на 11.

Меѓународната вселенска станица, која орбитира на надморска височина од околу 409 километри, работи речиси 25 години како меѓународна истражувачка лабораторија и клучна платформа за вселенска соработка, управувана првенствено од САД и Русија.