Соединетите Американски Држави повторно ставија вето на предложената резолуција на Советот за безбедност на Обединетите нации за итен прекин на огнот во Појасот Газа.

Хамас ја осуди одлуката на САД, велејќи дека израелската окупација има за цел „убивање и раселување“ на Палестинците.

Израелската армија не запира со воените операции во сите делови на Газа, тие дејствуваат од копно, од море и од воздух, особено во областа Кан Јунис, на југот на енклавата, каде, се смета дека е лоцирана главната база на Хамас.

Израелскиот премиер Бенјамин Нетанјаху и министерот за финансии Безалел Смотрич изјавија дека Израел нема да плаќа никаква цена во замена за ослободувањето на заложниците кои сè уште ги држи Хамас во Газа.

Смотрич оцени дека враќањето на 134-те заложници е „многу важно“, но дека нивното ослободување не може да биде условено „по секоја цена“.

Израелските одбранбени сили (ИДФ) објавија дека уште три војници загинале во борбите во Појасот Газа.

Бројот на загинатите израелски војници од почетокот на копнената операција во Газа се искачи на 237, соопшти израелската армија.