Подготвителната седница за Законот за употребата на јазиците се очекува да биде одржана во периодот од 19 до 21 март, изјави претседателот на Уставниот суд, Дарко Костадиновски, посочувајќи дека денеска Судот ќе има редовен работен состанок на кој ќе се утврдува листата на учесници и спорните правни прашања во врска со иницијативите по овој закон.

– Не ми е јасно зошто повторно се бара мислење од Венецијанската комисија, од каде веќе се изјаснија и ги прогласија за спорни неколку члена од Законот за употребата на јазиците. На листата на учесници на седницата што ја предложил судијата известител се предложени повеќе од 20 имиња, како експерти по уставно право, меѓународно право, човекови права и поранешни судии на Европскиот суд за човекови права. Исто така не е јасно зошто на уставни судии им е потребен совет од правни и други експерти, кога тие по вокација се најголемите аворитети по Уставно право во Македонија. Мислам дека Костадиновски се обидува да се сокрие зад колективна одлука, иако одлуката на Уставниот суд е сама по себе колективна. Тој рече дека подготвителната седница ќе биде закажана за 21 март. Иако не верувам дека ќе дојде до ескалација на стабилноста во земјава, сепак може да се претпостави дека политичката тензија ќе порасне во периодот што ни претстои – вели новинарот на Слободен печат, Срѓан Ивановиќ.