Македонија со пораз од Франција во саботата го заврши настапот на светското првенство во ракомет. Со две победи, два нерешени резултати и два порази, Македонија го освои 15-то место во генералниот поредок.

„Македонија го заврши настапот на овој Мундијал со поразот од Франција. Одигравме добро, иако имавме технички грешки. Се исплашивме од Французите што е нормално, бидејќи тие се едни од фаворитите за златниот медал. Но на натпреварот со Французите покажавме дека знаеме да играме ракомет, и дека „не е сè во Франција, има нешто и во Македонија“. Можеби на натпреварот требаше да му се даде шанса на Александар Петковски и поголема минутажа да добие голманот Иван Галевски. На ова првенство, сите играчи одиграа солидно, сите според очекувањата на јавноста. Би потенцирал дека целиот товар на десно крило успешно го понесе Ненад Костески, кој година и пол беше без клупски настап поради тешката повреда на коленото. Секоја чест за него. Претходно потенциравме дека Кузмановски треба да ги поведе овие млади ракометари и да биде лидер и тоа и го направи. Митревски како и секогаш, одличен. Можеби единствено изненадување е што Кизиќ доби шанса пред Галевски, но покажа дека е во одлична форма и работел добро во Алкалоид…“, вели новинарот на Слободен печат, Стефан Крстески.