Со гол на Филип Кузмановски во последната секунда, Македонија освои бод на вчерашниот натпревар со репрезентацијата на Австрија.

„Македонската репрезентација одигра нерешено, во натпревар каде постојано се менуваше водството на двете страни. Моравме да ја добиеме ваквата Австрија која на овој мундијал е без главните двајца играчи – левиот бек Никола Билик и десниот бек Јанко Божовиќ. Забележлив беше и психичкиот и физичкиот замор кај нашите ракометари по натпреварите со Унгарија, Холандија и Гвинеја. Имавме шанса да го сведеме натпреварот во наша полза со седмерецот на минута ипол пред крај, но промашивме, односно австријскиот голман го одбрани шутот на Кузмановски. Ни се повторуваат нештата. Промашуваме седмерци, не користиме шанса на играч повеќе. Кузмановски како најискусен и единствен бек шутер треба да ги искористи таквите шанси, но едноставно се губи во тие моменти“, вели новинарот на Слободен печат, Стефан Крстески.