Министерството за внатрешни работи вчера започна акција насочена кон пресметка со насилни криминални групи. Полицијата уапси осомничени лица во Арачиново и Чаир, но и на повеќе локации низ Скопје.

Неофицијално, има лица и до кои не се стигнало поради тоа што успеале да дознаат информации пред полицијата да добие наредба да прави претреси. За реализација на оваа акција беше вклучено Министерството за внатрешни работи, а откако обвинителот дошол до сознанија преку претходни истражни мерки.

– Според првичните информации, целта на акцијата е разбивање на кланови кои делувале на територија на Скопје, а дел и надвор од градот. Уапсените се врзуваат и со пукањата кои се случија изминатите месеци, но и со други кривични дела. Според моите сознанија, ова не е прва полициска акција насочена кон групите на криминалните организации да биде пробиена, па резултатот на крајот да биде половичен. Инаку полицијата е доста активна во последниот период и очигледно дека постои волја да се стави крај на организираниот криминал и луѓето што ја загрозуваат општата безбедност. Ќе треба да почекаме, да видиме како ќе се развиваат за да дадеме комплетна оценка, но и сега можеме да ги пофалиме полициските сили за ангажираноста во овој период – вели новинарот на Слободен печат, Срѓан Ивановиќ.