Локацијата на Артан Груби кој е во бегство, овие два дена е главна тема во јавноста, откако актуелниот вицепремиер, Изет Меџити во изјава за албанската ТВ станица „Ора њуз“ кажа дека Груби во моментов е во Албанија, а не во Косово.

– Се доби впечаток дека министерот за внатрешни работи Панче Тошкоски можеби и не знае каде точно се наоѓа Груби, а можеби и навистина не сака да шпекулира за тоа дали поранешниот вицепремиер е во Косово или во Албанија. Слично кажа и премиерот Мицкоски, а само Изет Меџити, вицепремиерот во македонската Влада беше волен да шпекулира и јавно да каже дека Груби е во Албанија. Зошто е тоа битно? Бидејќи се појави шпекулација дека Груби поседува албански пасош, што значи дека во случај тој навистина да се наоѓа во Албанија, тогаш официјална Тирана можеби нема да реагира на меѓународната потерница распишана од нашата држава, бидејќи ретко која земја екстрадира свои граѓани – вели новинарот на Слободен печат, Срѓан Ивановиќ.