В недела од 16.00 часот на стадионот „Вембли“ во Лондон фудбалерите на Лидс и Саутемптон ќе играат за обезбедување место во Премиер лигата за следната сезона 2024/25. Во плеј-офот од англискиот Чешмпионшип, Лидс го елиминираше Норич сити, а Саутемптон беше подобар од Вест Бромвич албион.

Медиумите често го опишуваат финалето на плеј-офот во Чемпионшип како „најскапиот натпревар во светот на фудбалот“. Причината е едноставна, а тоа е поради парите што ќе ги собере победникот од овој натпревар. Не веднаш по натпреварот, туку во следната година.

Нема сомнеж дека Премиер лигата е најгледаната и најпопуларната лига во светот. Парите што клубовите ги заработуваат од ТВ правата одат до неверојатни граници, дури и тимовите кои ќе завршат во зоната за испаѓање ќе заработат над 100 милиони фунти. Кога на тоа ќе се додадат спонзорските договори кои ќе се зголемат, како и цената на билетите и процентот на исполнетост на стадионот, кој е над 90% во најсилниот ранг, се проценува дека една сезона во Премиер лигата носи повеќе од 200 милиони евра. Оттука и епитетот „најскап натпревар“.

Тие пари ќе ги заработи Лидс јунајтед или Саутемптон во следната година. Но само еден од нив, оној кој ќе победи во големото финале во недела.

Своевремено еден од милениците на навивачите на Лидс, македонскиот репрезентативец Езџан Алиоски нормално ја даде поддршката за клубот од „Еланд роуд“ на патот да се врати во Премиер лигата. Инаку Алиоски настапуваше за Лидс во периодот од 2017 до 2021 година со 21 гол во 161 настап.

– Како фан на Лидс, сакаме да го видиме назад клубот во Премиер лигата. Одигравте фантастична сезона и има уште еден чекор да се направи. Верувајте во себе и не дозволувајте било што да ве спречи во постигнувањето на вашите цели. Ние сме Лидс, ви посакувам сè најдобро. Со среќа. Лидс, Лидс, Лидс – се зборовите на Алиоски.