Дали сте меѓу оние кои ја украсуваат куќата штом почне декември или ја поставувате елката во последен момент? Без разлика на одговорот, можеби ќе забележите дека носот почнува да ви тече веднаш штом ќе ги ставите новогодишните украси.

„Иако настинката е синоним за зима и не е невообичаено да се чувствувате болни во овој период од годината, можеби настинката не е виновникот за течење на носот. Затнат или растечен нос, чешање и насолзени очи, кивање и кашлање исто така може да бидат знаци на алергија предизвикана од божиќните украси“, изјави д-р Бавини Шах за „Сан“ (The Sun).

Таа објасни дека алергијата, која е имунолошки одговор, се јавува кога имунолошкиот систем погрешно идентификува безопасна работа како штетна.

„Имунолошкиот систем потоа произведува антитела кои се борат против туѓите клетки со ослободување на хемиски супстанции. Токму овие работи предизвикуваат алергиска реакција“, додаде таа.

Според д-р Шах, постојат пет причини зошто може да се појават сезонски алергии во овој момент.

Новогодишен синдром

„Новогодишен синдром“ е термин кој се користи за опишување на алергиски реакции или респираторни проблеми што некои луѓе ги доживуваат кога се околу вистински борови. Терминот се однесува на симптоми како што се кивање, кашлање, чешање на очите, затнат нос или дури и напади на астма кои можат да се појават поради мувла или други алергени кои можат да бидат присутни на борот.

Прашливи украси

Украсите собираат прашина 11 месеци, па не е чудно што тие можат да бидат поттик за алергии. Докторот советува да ги избришете украсите со влажна крпа пред да ги внесете во вашиот дом.

Прашински грини

Прашинските грини доаѓаат со прашина. Тие се микроскопски членови на фамилијата пајаци кои се хранат од мртвите клетки од кожата. Тие се ситни, безопасни суштества, но нивните отпадни честички содржат протеини кои можат да предизвикаат алергиски реакции кај некои луѓе.

Вообичаени реакции вклучуваат кивање, течење или затнат нос, чешање или насолзени очи, кашлица или осип на кожата во потешки случаи.

Спори на мувла

Друг алерген што може да го демне вашиот дом за време на Божиќ се спорите на мувла , кои можат да предизвикаат алергиски реакции како што се кивање, кашлање, отежнато дишење, чешање на очите или посериозни респираторни проблеми при вдишување.

Како што објасни д-р Шах: „Спорите на мувла можат да бидат присутни на новогодишни елки, особено на живи дрвја како бор, ела или смрека.

Божиќни миризливи свеќи

Палењето на божиќна миризлива свеќа може да биде пријатен допир на вечерта и да направи вашата куќа да мириса вкусно.

Но, за жал, хемикалиите и мирисите во некои можат да предизвикаат алергии или алергиски реакции, предупреди д-р Шах.

Генералниот лекар објасни: „Многу миризливи свеќи содржат синтетички мириси, бои и адитиви кои ослободуваат испарливи органски соединенија кога се согоруваат. Овие хемикалии можат да го иритираат респираторниот систем, што доведува до симптоми како кашлање, кивање или конгестија“.