Во средното образование ќе се воведува вештачката интелигенција (ВИ) и ќе се применува за различни теми по сите предмети и во слободните училишни активности, соопшти денеска министерката за образование и наука Весна Јаневска.

Таа вели дека ВИ ќе им биде корисна на учениците да размислуваат креативно, а на наставниците за да ги планираат предавањата и тестовите, како и за автоматизирање на различни административни процеси во училиштата.

За воведување на ВИ во наставата, МОН и Бирото за развој на образованието ќе имаат стручна поддршка од приватната високообразовна установа и друштвото за интернет едукација кои работат под брендот Бреинстер, со која соработката беше формализирана денеска со меморандум.

Учениците, вели Јаневска, веќе го користат ChatGPT и за разлика од генерациите пред 20 години, постојано се со паметни телефони. Затоа, рече, во наставата се воведени и смарт-таблите бидејќи таблите со креда не им се привлечни.

– Со вештачката интелигенција може за една до две минути да се добијат распоред за часови и распоред на наставници, може да им ги средува сметководствените потреби, на наставниците може да им направи наставни ливчиња, ако ги има податоците за темата што се учи, може да им направи тестови, вежби… Децата може да ја користат на една платформа да вежбаат, да решаваат задачи, да одговараат прашања од одредена тема во учебникот. Се тоа ќе биде многу побрзо и ќе биде соодветно на она што се случува во светот во овој момент. Најголемата придобивка од ВИ за учениците ќе биде тоа што ќе ги натера да мислат и што ќе им овозможи она што на нашите деца им недостасува според ПИСА-тестирањето, истакна Јаневска.

При користење на ВИ, учениците е важно да се заштитат и да ги проверуваат добиените информации, да стекнат знаења и вештини и за етичка примена на вештачката интелигенција во секојдневието, за време на наставата, а понатаму и во нивните професии.

– На ова поле интензивно работиме и не чека многу работа во следниот период. На Факултетот за информатика во Штип веќе подготвуваме документ со насоки за наставниците и за учениците за примена на ВИ од септември, што ќе биде увертира на воведувањето конкретни теми во наставните програми за секое одделение. Примарниот фокус на меморандумот што денеска го потпишуваме е поддршка на воведување на вештачката интелигенција во средните училишта. Но, Бреинстер ќе помогне и во интегрирање на претприемништвото како област и тема во наставните програми во средното образование, додаде Јаневска.