Венус Вилијамс (43) ќе учествува на грен-слем турнирот САД Опен откако доби вајлд-карта од Тениската асоцијација на САД (УСТА). Ова ќе и биде рекордно 24. учество на Вилијамс на овој турнир.

Седумкратната гренд-слем шампионка Вилијамс, која сега е рангирана на 533. место на ВТА листата, дебитираше на САД Опен во 1997 година а ја освои титулата во 2000 и 2001 година.

Откако паузираше шест месеци поради повреда, Вилијамс се врати во јуни, а неделава ја забележа својата прва победа против топ-20 тенисерка победувајќи ја Вероника Кудерметова (16-рангирана на ВТА) на Мастерсот во Синсинати.

Данката Каролине Вознијачки (33) ќе го има својот прв грен-слем настап по повлекувањето по Австралија опен 2020, откако на поранешниот светски рекет број еден исто така му беше дадена вајлд-карта за САД Опен.

Таа се пензионира во 2020 година за да основа семејство, но направи камбек на неодамнешниот канадски опен по повеќе од три години оддалеченост од спортот.

САД Опен, последниот грен-слем во годината, започнува на 28 август.