Британскиот премиер Борис Џонсон за време на денешната посета на Украина и средбата со украинскиот претседател Володимир Зеленски, ветил дека Велика Британија ќе обезбеди 120 оклопни возила за оваа земја, како и нови противбродски ракетни системи.

Тоа е дополнителна помош покрај веќе ветената за испорачување на висококвалитетна воена опрема во вредност од 100 милиони фунти, соопшти Даунинг Стрит, пренесе Ројтерс.

Џонсон по состанокот со Зеленски рекол дека Украина покажала „лавовска храброст“, а потоа додал дека Британија дополнително ќе ги засили санкциите кон Русија.

„Привилегија е тоа што можев да допатувам во Украина и лично да се сретнам со Зеленски во Киев. Украина им пркоси на сите шанси и успеа да ги спречи руските сили од портите на Киев, ова е најголемиот подвиг во 21 век“, рекол Џонсон, а пренесува „Скај Њуз“.

Тој потоа ја искористил прилика уште еднаш да ги осуди потезите на Путин.

„Денеска јасно ставив до знаење дека Велика Британија е на страната на Украина во оваа војна. Ќе ја засилиме сопствената воена и економска поддршка за да можеме да ставиме крај на оваа трагедија и да бидеме сигурни дека Украина ќе опстане и ќе напредува како слободна и суверена нација“, изјави Џонсон.

?@ZelenskyyUa:
Робимо все, щоб наша наступна зустріч із @BorisJohnson відбулася вже під мирним українським небом?? pic.twitter.com/fKlGn69QU9

— Defence of Ukraine (@DefenceU) April 9, 2022

Британија, исто така, како што пренесува Ројтерс, ќе гарантира дополнителни 500 милиони долари во кредити за Украина во Светската банка, зголемувајќи ги гаранциите за вкупен заем на милијарда долари, како и да ги либерализира царините на поголемиот дел од производите кои се увезуваат од Украина и да преземе други мерки за либерализација на трговијата.

Во меѓувреме Украинците велат дека руската страна ги зајакнува своите сили на истокот од земјата и тврдат дека се подготвуваат за нов напад.

Инаку во последните неколку повеќе западни лидери ја посетија Украина вклучувајќи ја и претседателката на Европската комисија Урсула фон дер Лајен.

Целта на нивните посети според извештаите на медиумите е да се истакне поддршката на Западот за Зеленски. Фон дер Лајен во саботата изјави дека Европската комисија ќе гарантира една милијарда евра наменети за Украина и земјите во кои прифаќаат бегалците.