Судот во Струга денеска го прифати супервештачењето кое го изврши судско-медицински одбор, а од кое ќе стане јасно зошто и дали по лекарска вина се отстранети трите органи – матката, јајникот и бубрегот кај родилката од Дебар Јалдз Веапоска. Таа отиде да се породи во болницата во Струга со царски рез, но заврши на скопските клиники во животозагрозувачка состојба откако во струшката болница извадени ѝ беа три органи.

Одбраната на докторите кои се обвинети денеска бараше да се направи ново супервештачење, што беше одбиено од судијата.

-Од тоа што го добив од вештаците, процедурите се испочитувани. Имало откажување, имало прифаќање од други лица, но тие составиле комисија и одговорно тврдат дека она кое е напишано е непристрасно и професионално а суштината на вештачењето ќе се презентира на наредното рочиште, рече судијата Јордан Јованов.

Јованов е трет судија што се смени откако почна процесот.

-После 4 години како сум во судница, првпат чувствувам дека правда ќе има. Судијата го прифати супервештачењето благодарение на Судска медицина и на супервештаците, правдата ќе ја добијам и дај Боже секогаш да биде вака, секогаш тие што ќе си бараат правда во судовите да ја најдат, рече Вепоска. 

Нејзиниот адвокат Сашо Јанев истакна дека допрва ќе почне вистинското изведување на доказите.

Во предметот обвинети се екс-директорот на струшката болница и гинеколог Мухамед Асани, неговиот син Блертон Асани и гинекологот Лилјана Јованоска за кривичното дело „тешки дела против здравјето на луѓето“. Делото застарува во 2026 година.