Утрово имало пукање во училиште во Брјанската област, Русија, потврдија оперативните служби за руската државна новинска агенција ТАС. „Ученичка од осмо одделение, донела огнено оружје од кое пукала неколку пати“, велат извори за рускиот медиум.

„Според првичните информации ученичката внела огнено оружје во зградата на гимназијата и испукала неколку истрели при што повредила три лица. После тоа девојчето се самоубило“, соопштија од полицијата.

Претходно информираа дека тројцата се ранети. Се претпоставува дека ученичката го зела оружјето на нејзиниот татко.

„Едно дете е примено, има повреди на рамото и коленото, состојбата е со средна сериозност. Даваме прва помош и најверојатно ќе биде пренесено во детска болница“, соопштија од градската болница во Брјанск.

Од Регионалната детска болница известија дека е примено уште едно повредено дете со рана на левото рамо. „Има 14 години, има прострелна рана. Состојбата е средно тешка, хоспитализиран е“, рекол изворот.

На местото на настанот работат полицијата и итната помош. Се истражуваат околностите на инцидентот. Градската управа извести дека две лица загинале, а четворица се повредени, но објавата подоцна била избришана.