Полската гранична полиција објави дека пронашле тела на тројца мигранти на различни локации на источната полска граница со Белорусија, а уште девет лица се хоспитализирани, пренесува АП.

Портпаролката на локалната полиција Едита Пачук за Радио 5 изјави дека локалните жители, кои собирале печурки во шумата во близина на границата со Белорусија и Литванија, пронашле тројца Ирачани, од кои едниот е мртов.

Останатите двајца се префрлени во полициски притвор и добиле лекарска помош.
Портпаролката на граничната служба Ана Михалска за АП изјави дека телата на преостанатите двајца странци се пронајдени и во близина на границата со Белорусија.

Обвинителството започна истрага за смртта на три лица.

Во одделен инцидент, осум мигранти, меѓу кои три жени и пет мажи, кои заглавиле во мочуриштата во близина на полската граница со Белорусија, а денеска тие се спасени од заедничките сили на граничната служба, полицијата, пожарникарите, армијата и хеликоптерската служба за брза помош.

Седум мигранти се пренесени во болница.

Членките на ЕУ Полска и Литванија претходно изјавија дека се соочуваат со зголемен притисок од мигрантите на нивните граници со Белорусија.

Тие го нарекоа „хибриден напад од режимот на белорускиот претседател Александар Лукашенко, со цел дестабилизација на ЕУ“.

Михалска рече дека повеќе од 3.800 обиди за илегални гранични премини од Белорусија биле спречени само во септември, а 320 само во саботата.

Премиерите на Полска и Литванија разговараа за мигрантскиот притисок од Белорусија