Ракометарите на Алкалоид продолжуваат да чекорат по патот кон врвот во ЕХФ Европскиот куп, па веќе во втората сезона како учесници во европските натпреварувања, „сино-белите“ од Автокоманда обезбедија историски пласман во финале во ова натпреварување.

Во борба за првиот меѓународен трофеј во клупската историја, Алкалоид ќе се соочи со грчкиот АЕК.

Финалната пресметка ќе се одигра во два натпревара, првиот дуел е закажан за викендот на 18 и 19 мај, додека реваншот ќе следува точно една недела подоцна. Кој тим прво ќе биде домаќин, а кој ќе го затвори финалето на свој терен, ќе се одлучи утре на ждрепка која ќе се одржи во седиштето на ЕХФ во Виена, со почеток од 11 часот.

Со овој резултат, Алкалоид има златна шанса да стигне до својот прв европски трофеј – подвиг што би значел огромен успех за клуб кој постои само неколку сезони.