Руското летало „Сојуз“ со двајца руски и еден американски астронаут беше успешно лансирано од космодромот Бајкoнур во Казахстан кон меѓународната вселенска станица каде екипажот ќе остане во наредните шест месеци.

Кејт Рубинс од американската НАСА и руските космонаути Сергеј Рижиков и Сергеј Куд-Сверчков од руската вселенска агенција „Роскосмос“ полетаа утрово во предвиденото време до меѓународната вселенска станица што кружи околу Земјата.

Таму, ќе го заменат руско-американскиот тим кој е во мисија од април и треба да се врати на Земјата за една недела.

– Минавме две недели во „Стар сити“, недалеку од Москва, а потоа 17 дена во Бајконур во многу строг карантин и сите направивме ПЦР тестови, рече американската астронаутка Кејт Рубинс пред лансирањето, најавувајќи интересни тестови во Вселената, вклучително и студија за растот на клетките во вонземски услови.