Медитеранската исхрана е позната по своите здравствени придобивки, бидејќи го намалува ризикот од сѐ – од срцеви заболувања до одредени видови рак – а сега, нова студија додава уште една придобивка на таа листа: подобро здравје на непцата.

Нашите заби и непца имаат големо влијание врз нашето општо здравје. Заболувањето на непцата, познато и како пародонтално заболување, е поврзано со хронично воспаление, срцеви заболувања, дијабетес, рак и предвремено породување.

Како медитеранската исхрана влијае на непцата?

Истражувачите откриле дека Британците кои не се придржувале до медитеранската исхрана имале тенденција да страдаат од потешки форми на болести на непцата, особено ако консумирале многу црвено месо. Тие, исто така, имале покачени нивоа на протеини поврзани со воспаление, пренесува „Јуроњуз“.

Од друга страна, луѓето чии навики во исхраната биле слични на медитеранската исхрана – богата со хранливи состојки, зеленчук, овошје, мешунки и маслиново масло – имале пониски нивоа на овие воспалителни маркери, познати како интерлеукин-6 (IL-6) и Ц-реактивен протеин (CRP).

„Нашите наоди укажуваат дека урамнотежената исхрана од медитерански тип потенцијално може да ги намали болестите на непцата и системското воспаление“, изјавил Џузепе Маинас, еден од авторите на студијата и истражувач на Кралскиот колеџ во Лондон.

Студијата, објавена во списанието „Journal of Periodontology“, опфатила 195 пациенти од болници во Велика Британија. Тие поминале стоматолошки прегледи, им биле земени крвни анализи, а биле испрашувани и за нивните навики во исхраната.

Ова е најновата студија што ги идентификува здравствените придобивки поврзани со медитеранската исхрана, меѓу кои се подобро здравје на срцето, квалитет на сонот и менталното здравје, како и намален ризик од дијабетес тип 2 и одредени видови рак.

Холистички пристап кон оралното здравје

Медитеранската исхрана е позната по своите антивоспалителни својства, што може да помогне да се објасни зошто изгледа дека таа има улога во здравјето на усната шуплина, наведоа истражувачите.

Маинас рече дека очигледната врска помеѓу исхраната, воспалението и здравјето на непцата „треба да се гледа холистички“ кога лекарите третираат пациенти со болести на непцата.

Се проценува дека околу милијарда луѓе ширум светот страдаат од болести на непцата, при што лошата орална хигиена и употребата на тутун се клучни фактори на ризик, според податоците на Светската здравствена организација (СЗО).

Оваа болест се карактеризира со гингивитис – крвавење или отечени непца – како и болка, непријатен здив и, во потешки случаи, разнишани заби.

Луиџи Нибали, еден од авторите на студијата и професор по пародонтологија на Кралскиот колеџ во Лондон, рече дека новите наоди придонесуваат кон „растечките докази за улогата што урамнотежената исхрана може да ја има во одржувањето“ на доброто здравје на непцата.

Во соопштението, сепак, тој додаде дека „потребни се повеќе истражувања за да се развијат персонализирани пристапи кои би им помогнале на луѓето во управувањето со здравјето на непцата“.