Природно е телото да се менува со возраста, а тука спаѓаат и промените во функцијата на уринарниот систем. Постарите луѓе, на пример, може да забележат дека мораат почесто да уринираат, дури и среде ноќ, што го прекинува сонот. Промените во функцијата на уринарниот систем често не се споменуваат, па многу луѓе развиваат лоши навики кои не ги препорачуваат уролозите.

Урогинекологот д-р Тирсит Шиферав Асфав објаснува дека бременоста и породувањето може да ги ослабат карличните мускули, што го зголемува ризикот од инконтиненција и пролапс на карличните органи.

„Покрај породувањето, стареењето може да ги ослаби и овие структури со текот на времето, а падот на нивото на естроген во текот на менопаузата придонесува за овие промени“, изјави таа за „Парад“.

Затоа, една од најважните работи што жените над 50 години не треба да ја прават е задржување на урината.

„Здравата навика за уринирање вклучува слушање на вашето тело и не задржување на урината предолго“, советува д-р Асфав.

Дополнително, урогинекологот д-р Алден Зено нагласува дека жените не треба да ги игнорираат непријатните симптоми поврзани со уринирањето.

„Најдобрата навика за жените над 50 години е да ги препознаат проблемите со уринирањето и навреме да се консултираат со лекар“, заклучил доктор Зено.