Големото финале на 21-то издание на „Танц фест Скопје“ ќе се одржи на 13 мај во Македонскиот народен театар со изведба на извонредната интерактивна кореографска претстава „Myselves“ на француската група „К-Данс“, пионери во спојувањето на современиот танц и дигиталната уметност.

Оваа уникатна изведба ја истражува врската помеѓу танчарот и неговите повеќе „јас“, инкорпорирајќи автономни и непредвидливи визуелни и звучни ефекти, кои ги пресликуваат емотивните и психолошките состојби на танчарот преку сензори за движење и оптичка анализа.

Поддржан од културниот центар „Интерарт“ и Францускиот институт во Скопје, овој настан носи уникатно уметничко искуство кое ги брише границите меѓу телото, технологијата и емоцијата.

Концептот, кореографијата и изведбата се на Жан-Марк Матос („К. Данс“, уметничка насока), Маријана Масон (кореограф и изведувач) и Антоан Шмит (дигитален уметник – визуелност, звук, интерактивност).

(Текстот е објавен во „Културен печат“ број 280, во печатеното издание на весникот „Слободен печат“ на 10-11.5.2025)