Марфи, 33-годишен белоглав орел, угина минатиот викенд за време на разорната бура што го погоди Сент Луис во Мисури. Тажната вест ја потврди Светското засолниште за птици во Вали Парк, каде Марфи живееше во последните години од својот живот.

Неговото тело беше пронајдено во засолништето по силните бури и торнада што го погодија регионот. Експертите извршиле обдукција и утврдиле дека Марфи се здобил со повреда на главата.

„Не можеме со сигурност да кажеме дали Марфи се исплашил и паднал од гранката или дали ветерот и дождот имале улога во неговата повреда. Иако тој помина многу бури во текот на годините без проблем, оваа можеби придонела за неговата смрт“, рекле од засолништето.

Марфи имаше трајна повреда на крилото, поради што не можеше да лета. Остатокот од животот требаше да го помине мирно во засолниште. Иако условите во азилот се безбедни, а птиците можат сами да бараат засолниште, ова невреме сепак беше фатално за него.

„Колку и да се трудиме да ги заштитиме нашите птици, понекогаш се случуваат несреќи кои се надвор од наша контрола“, додале од засолништето.

Инаку, Марфи се здоби со светска слава во 2023 година кога чуварите го забележаа како „инкубира“ камен со посебна грижа. Тој беше толку посветен што изгради гнездо и внимателно го чуваше каменот како да е вистинско јајце.

Оваа слатка приказна имаше среќно продолжение кога Марфи набрзо стана згрижувачки родител на вистински орел, сирак стар само една или две недели. Марфи трпеливо го научи малиот орел како да јаде, да се мие и да преживее. Во јули 2023 година, неговиот прв штитеник беше подготвен да биде пуштен во дивината.

Една година подоцна, Марфи ја повтори својата улога и стана згрижувачки родител на друг орел. Тоа младенче сè уште е во засолништето, а се очекува да биде подготвено за живот во дивината во летото 2025 година.

Иако не можеше да лета, Марфи беше познат по својата истрајност, грижа и заштитнички однесувања. Засолништето го опишува како „духовит и по малку строг“, а поради неговата посебна приказна за татковството, целиот свет го засака.

Белоглавите орли во дивината живеат од 20 до 25 години, додека оние во светилиштата можат да живеат уште подолго, како што беше случајот со Марфи.