Од понеделникот училиштата во Карпош добија греење, но проблемите допрва треба да се надминат. Министерката за образование и наука Весна Јаневска очекува деновиве да има состанок со градоначалникот Стевчо Јакимовски, кој побара одложување на грејната сезона во училиштата бидејќи должат кон ЕСМ вкупно околу 8.300.000 денари за парно за минатата сезона и го повика Министерството да си го плати долгот.

Јаневска: Верувам дека Стевчо Јакимовски е способен и ќе најде начин да ги затопли училиштата

По неколкудневните „обвинувања“ меѓу Јаневска и Јакимовски, од Општина Карпош потврдија дека училиштата имаат греење, но, како што велат, потребна е и средба за да се решат проблемите.

– Греење во училиштата има, а има и најави за средба. Тоа е важно што од двете страни има добра волја за да се реши проблемот и се надеваме дека наскоро ќе се оствари средбата – велат од Општината за „Слободен печат“.

Министерката Јаневска најави дека за следната година веќе се планирани поголеми средства за сите општини кои се во слична ситуација.

– За жал, не се надмина сè уште проблемот. Очекувам овие денови да имам состанок со градоначалникот на Карпош. Жал ми е што треба да соопштам дека се искористени блок-дотациите за оваа година. Оваа година Општина Карпош со ребалансот добила 18 милиони денари повеќе, за што верувам дека не се сосема доволно и искрено се надевам и повторно велам дека ќе изнајдеме некакво решение со градоначалникот, се разбира со негови поголеми услуги отколку од Министерството бидејќи, сепак, станува збор за закон – изјави министерката.

Јакимовски до Јаневска: Се јавувам доброволно да одам на часови кај министерката да ми објасни како да ги менаџирам парите

Јакимовски се пожали дека МОН во 2022, 2023 и 2024 година континуирано ги намалувало предвидените средства за образование за оваа општина.

– На пример, во 2022 година, кога биле предвидени 39 милиони, исплатени се само 20 милиони, тоа значи половина. Деветнаесет милиони денари, или 300.000 евра за оваа 2022 година се исплатени помалку. За 2023 година, предвиделе како што рековме 28 милиони, а исплатиле 32 милиони денари, четири повеќе. Значи 2022 година ни скратиле 19 милиони, а лани ни додале 4 милиони што значи, не ни исплатиле 15 милиони денари, пари за училиштата во Карпош – тврди градоначалникот.

Пред почетокот на грејната сезона, Јакимовски најави дека грејната сезона во училиштата во Карпош ќе почне од 1 ноември, наместо на 15 октомври, за да се заштеди на трошокот за парно.

Станува збор за училиштето „Братство“ со неплатени сметки за греење од 464.000 денари, за „Јан Амос Коменски“ кое должи 1.130.000 денари, „Димо Хаџи Димов“ со 565.000 денари, долгот на ОУ „Владо Тасевски“ изнесува 1.030.000 денари, на „Војдан Чернодрински“ 2 180 000 денари, „Христијан Тодоровски Карпош“ 828.000 денари, „Лазо Трповски“ 1.008.000 и „Петар Поп Арсов“ должи 1.116.000 за парно греење. Единствено училиштето „Вера Циривири Трена“ нема долг затоа што таму се учи само во една смена и „Аврам Писевски“, кое се загрева на нафта.

Осум училишта во Карпош ќе останат без греење, должат над 8 милиони денари за парно: Јакимовски ја повика Владата да ги плати долговите