Убиството на мигрантката Фатмата кај Гевгелија стигна до пратениците од Европскиот Парламент и до Жозеп Борел
Група од 23 пратеници во Европскиот Парламент завчера поставиле пратеничко прашање за убиството на Фатмата од Сиера Леоне, која беше застрелана кај Гевгелија на 19 април откако ја преминала грчката граница и влегла во државава со сопругот Абу Бакар, дознава „Слободен печат“ од свои доброупатени извори. Прашањето според процедурите ќе го одговори Жозеп Борел, висок претставник на ЕУ за надворешни работи и безбедносна политика, во својство на потпретседател на Европската Комисија.
Препорачано
„Не можеме да дозволиме страшни приказни како онаа на Фатмата да се случуваат на границите на нашата Унија и не можеме да дозволиме нејзината смрт да помине незабележано без да биде задоволена правдата. Напишав пратеничко прашање за да го свртам вниманието на европските институции на оваа млада жена, но и да повикам на почитување на човековите права и на границите на ЕУ. Исто така прашав како се развиваат билатералните односи со Северна Македонија, земја кандидат, во однос на управувањето со миграцијата и пристапот до правосуден систем кој е универзален, слободен и праведен“, вели пратеничката во Европскиот Парламент Алесандра Морети.
Пратеници кои го поддржале нејзиното прашање кое се очекува да биде одговорено од Борел наредниот период, се Брандо Бенифеи, Дамиен Кареме, Џулијано Писапиа, Клер Дали, Мик Валас, Марија Арена, Пјер Лароутуроу, Патриција Тоиа, Тијс Реутен, Даниела Рондинели, Диетмар Костер, Камила Лаурети, Франциско Гуереиро, Карен Мелкиор, Гвендолин Делбос Корфилд, Пина Пициерно, Пјетро Бартоло, Елизабета Гуалмини, Максимилијан Смериглио, Беатрис Коваси и Франко Роберти.
Убиството на Фатмата од Сиера Леоне се случи во истиот период кога ФРОНТЕКС – Европската агенција за гранична и крајбрежна стража се распореди на границата.
Фатмата имаше 23 години, најверојатно беше бремена (со сопругот немале ни пари ни документи да го потврдат тоа) и настрада од куршум за кој се вештачи кој го испукал.
Полициската верзија на настаните е дека шверцер на мигранти се обидел да му го одземе полицискиот пиштол на полицискиот службеник, но на оваа верзија ѝ противречат и Абу Бакар и семејството на Фатмата кои тврдат дека немало никаков физички напад врз полицаецот.
Откако живееле во грчки бегалски камп и им беше одбиен азил, Фатмата и Абу Бакар заминале од Грција во Македонија каде Фатмата беше убиена. Сопругот на Фатмата, Абу Бакар тврди дека врескал, повикувал помош и барал да биде однесен во болница со сопругата која веќе умирала. Но, бил приведен и според неговите зборови, полицијата му понудила да го одведат и да го пуштат на српската граница за сам да го продолжи патувањето. Тој одби и сега бара азил во Македонија за да ја бара правдата за својата сопруга во македонските судови.
Сестрата на убиената 23-годишна мигрантка од Сиера Леоне, Фатмата, во ексклузивно обраќање преку „Слободен печат“ фрли поинаква светлина врз настаните кои се случувале на 19 април во близина на Гевгелија, а каде Фатмата загина откако полициски службеник испукал куршум од службениот пиштол.
Полициската верзија на настаните, е спротивна на она кое го тврди семејството водејќи се од сведоштва на присутните останати мигранти, меѓу кои бил и Абу Бакар, сопругот на девојката. Полицијата извести дека откако мигрантите биле забележани во две возила, полицијата се обидела да ги запре, а при тоа едниот од шверцерите, 26 – годишниот К.Ј. физички го нападнал полицаецот обидувајќи се да му го одземе пиштолот.
„Притоа полицискиот службеник испукал од службениот пиштол и погодил еден од мигрантите (жена), која веднаш била пренесена до Итната медицинска помош каде починала“, известија од МВР во своето соопштение.
Но, сестрата на Фатмата во видео обраќање до македонската јавност кое го испрати до редакцијата на „Слободен печат“ повикува граѓаните да им се приклучат во барањето на правдата и прашува зошто полицаец пукал во невооружена девојка додавајќи дека немало никаков физички напад врз полицаецот.
„Министерството за внатрешни работи тврдеше дека полицискот службеник пукал, зашто имало физички напад меѓу возачот и полицаецот. Ова не е вистина. Абу Бакар беше таму, други луѓе беа таму: Немаше физички напад. Ова е лага. Сакаме правда за Фатмата и сакаме луѓето од Македонија да се борат со нас. Сакаме да ја знаеме вистината. Зошто полицаецот застрела невооружена девојка? Сакаме фер и транспарентно судење и одговори на прашањата кои нè измачуваат. Единственото што би можело да ни даде малку мир, или барем некакво олеснување – е да биде утврдена вистината за убиството на Фатмата и вистината да ја знае целиот свет. Ве молиме да ни се приклучите во борбата за вистината, ве молиме придружете ни се во тоа да не ја заборавиме“, вели таа во своето видео обраќање до македонската јавност.
Од Јавното обвинителство за „Слободен печат“ пред три недели испратија одговор дека обвинителот наредил да се спроведе истражна постапка против полицискиот службеник поради основано сомнение за кривично дело „тешки дела против општата сигурност согласно член 292 од Кривичниот Законик“.
„Сè уште се постапува во дел од наредбите за вештачење издадени од Основното јавно обвинителство за гонење организиран криминал и корупција за целосно расчистување на настанот. Откако ќе бидат испитани сите околности, ќе биде донесена јавнообвинителска одлука за натамошниот тек на постапката, а јавноста ќе биде известена“, пишува во одговорот на нашето прашање кои нови работи може да се споделат со јавноста од иницирањето на постапката.
