Дијабетичарите во земјава се на крај со трпението. Ако до 20 јули Министерството за здравство не им го овозможи сето она кое им е потребно за менаџирање на болеста излегуваат на протест. Претседателот на Сојузот на здруженија на дијабетичарите Димче Велев, за „Слободен печат“ вели дека под итно треба да се дистрибуираат инсулин, ленти, игли и глукомери за сите пациенти со дијабетес и да го добијат тоа што им следува, вклучително и антидијабетната терапија која е дефицитарна, односно за некои пациенти ја има, а за други ја нема. На пример, од 70 пациенти во Велес, тврди тој, има само 40 што добиваат антидијабетна терапија а за другите ја нема, од непознати причини. Едноставно, во инсулинските аптеки таа не е навремено дистрибуирана, што ги става во неповолна положба пациентите бидејќи тие мора да се снаоѓаат, да позајмуваат терапија едни од други па да си ја враќаат и да живеат во неизвесност.

Министерството за здравство им „крчка“ на дијабетичарите понеточни апаратчиња за мерење шеќер

-Рековме дека 20 јули е последниот датум на кој што нашите кооперативност, трпение и разбирање ќе завршат. Доколку се потребно не ни се обезбеди до тој датум, тогаш на 21-ви јули ќе бидеме ние пациентите и пред владата и пред Министерството за здравство на протест, вели Велев за „Слободен печат“.

Пациентите со дијабетес веќе седми месец се во незавидна положба да ја бараат својата терапија во инсулинските аптеки ширум државата и да не ја наоѓаат, било поради поместен тендер или други, непознати причини. Ова негативно влијае на домашниот буџет на секој еден пациент со дијабетес, бидејќи лентите се скапи, па дури и кога ги наоѓаат на приватно во аптеките, за нив плаќаат по 700 денари од сопствен џеб.

-Во земјава има антидијабетна терапија, ама не е правилно дистрибуирана по градови и така дел од пациентите остануваат без неа. Ако ти се погоди ќе земеш, ако не ти се погоди нема да земеш. Исто така, не постои можност за рефундација кога набавуваме од друго место. Значи треба да се промени законот и да има програма за рефундација. Исто така бараме да има референтна цена од целиот свет, да ни се издаваат медицински потврди со кои ќе можеме да добиеме олеснувања, додава Велев.

Дијабетичарите сметаат дека Министерството за здравство треба да се координира со Фондот за здравство и да дефинира најниска референтна цена, која што Фондот за здравство ќе ја покрива, а разликата од таа цена до цената на друго избрано поквалитетно помагало да биде на товар на пациентот.

Нема инсулин „Тресиба“, дијабетичарите да се снаоѓаат до понеделник

Барањата на Сојузот на дијабетичари се однесуваат на 116 илјади граѓани од земјава со дијабетес. Оттаму бараат кога се распишуваат тендери за набавка на глукомери за дијабетес тип 1 и тип 2, да се бира апаратчето што е најквалитетно, а не тоа што е најевтино.

Предлагаме конечно МЗ да го ослободи буџетот и програмата за набавка на глукомери и ленти, а во координација со ФЗОСМ да се формира референтна цена. Сметаме дека треба да се дефинира најниска референтна цена која ќе биде покриена од страна на ФЗОСМ а разликата од таа цена до цената на друго избрано покавалитетно помагало да биде надоместена од страна на самите пациенти, велат оттаму.

Во минатото Фондот за здравство навремено им доставуваше на дијабетичарите опрема. Но сега, пациентите се во небрано, дел од нив немаат пари да си купат лек, лентите кои треба бесплатно да ги добиваат ги плаќаат приватно, а ако ги нема ги позајмуваат меѓу себе, слично како и пенкалата за инсулин.

Министерот за здравство Фатмир Меџити, претседателот на Комиисјата за дијабетес Ирфан Ахмети и претставник од јавни набавки, се сретнаа со Здружението и разговарале за надминување на предизвиците со кои се соочуваат пациентите.

Проблемот е во јавните набавки а Министерството тврди дека се прават напори ситуацијата да се нормализира.

-Имало некои задоцнувања во јавните тендери, не знам зошто е тоа така, но преземавме мерки повеќе да не се случува, со поставување постулати по автоматизам на нештата а не по волја на министерот тие тендери да бидат навремено објавувани, рече Меџити.