Андон Бошковски имаше триумфално деби на клупата на Т. Пролет, откако овој клуб славеше со 38:32 на пријателскиот меч со Прилеп што беше одигран во Маврово.

Ова беше прв од неколку натпревари кои Т. Пролет ќе ги игра во наредниот период како загревање за двомечот против шпанскиот Гранолјерс во квалификациите за Лигата на Европа.

Првото полувреме донесе израмнета игра, а на одмор се замина со предност на Т. Пролет од минимални 19:18.
Клучната позитива беше направена во првиот дел од второто полувреме, па на десет минути до крајот резултатот гласеше 32:22 за тимот на Т. Пролет.

Тренерот Бошковски им даде шанса на сите ракометари, а малиот пад на концентрацијата во финишот им овозможи на противниците да ја намалат негативата, за конечни 38:32.

Во победничките редови Џонов беше најефикасен во редовите на Т. Пролет со девет гола, осум постигна капитенот Андоновски, а седум пати прецизен беше Аларов.

Следен предизвик за избраниците на Бошковски ќе биде контролниот дуел со вториот тим на Е. Пелистер.