Пред 30 години почина легендарниот Курт Кобејн, фронтменот на групата „Нирвана“, човекот кој го промени ликот на музичката сцена на крајот на 80-тите.

Заедно со Ејми Вајнхаус, Џими Хендрикс, Џенис Џоплин и многу други, Курт почина нешто повеќе од еден месец по неговиот 27. роденден, станувајќи „член“ на „клубот 27“ – група млади уметници кои трагично загинаа на 27 години.

Кобејн порасна во скромно семејство – татко му беше механичар, а мајка му келнерка. Кога имаше девет години, неговите родители се разведоа, а тој подоцна откри дека тоа искуство му оставило засекогаш трага. По разводот, тој помина извесно време со својот татко и неговото ново семејство, но бунтовното однесување на Курт како тинејџер беше премногу за нив. Затоа го „остави“ на грижа кај пријателите и членови од семејството.

На неговиот 14. роденден, доби користена гитара за подарок. На неа ги направи првите музички чекори, па научил да свири песни од „Лед Цепелин“ и „Квин“.

Неколку години подоцна го запознава Крист Новоселиќ, љубител на панк-музиката. Така се роди „Нирвана“ во 1987 година. Ним им се придружи Чад Ченинг на тапани, па две години подоцна го снимија својот прв албум „Bleach“. Местото на Чад набрзо го замени Дејв Грол, а во 1991 година испишаа историја – го издадоа албумот „Nevermind“, на кој беше објавена песната „Smells like a teen spirit“.

Набрзо станаа синоним за „гранџ“ – нова музика и начин на живот што младите го обожаваа. Неуредната фризура на Кобејн, широката и носена облека, станаа посакуваниот „изглед“ на цела генерација.

Милионите обожаватели, постојаните концерти, новите песни и видеозаписи беа премногу за Курт. Тој се бореше со депресија и како и многу ѕвезди од 90-тите, набрзо стана зависник од дрога. За време на турнејата „Неврмајнд“ во 1992 година, на виделина излезе неговата зависност од хероин. Тој наводно заспал неколку пати за време на снимањето со фотографот Мајкл Левин.

Истата година Курт се ожени со актерката и музичар Кортни Лав. Се венчаа на Хаваи, а Курт на церемонијата дојде во пижами. Тој наводно бил премногу мрзлив за да облече костим, а Кортни подоцна откри дека пријател ја предупредил дека бракот со Курт ќе ѝ го „уништи животот“. Недолго потоа дознала дека е бремена, а призна и дека се дрогирала пред да дознае за бременоста. Подоцна истата година, парот ја доби ќерката Френсис.

Последните денови од животот на Кобејн беа тешки. За време на европската турнеја, му беше дијагностициран тежок облик на бронхитис, поради што беше хоспитализиран во Рим. Неколку дена подоцна се предозира со комбинација на дроги и алкохол. Тој преживеа, а потоа се врати во САД.

Во една прилика Кортни повикала полиција и рекла дека се плаши дека Курт ќе се самоубие затоа што се заклучил со пиштол, но тој тоа го негираше. Се согласи да оди на лекување, но набргу побегна од центарот.

Иако околу неговата смрт кружеа бројни теории на заговор, од кои една беше дека е убиен, властите неговата смрт ја опишаа како самоубиство. Тој остави и проштално писмо, кое му го упати на Бода, замислениот пријател од детството.

Гитарата на Курт Кобејн продадена на аукција за 1,5 милиони долари