Три години без легендарниот Аки Рахимовски – гласот што го одбележа „Парни Ваљак“. На денешен ден, пред три години, не напушти Аки Рахимовски, фронтменот на еден од најпознатите бендови на овие простори – „Парни Ваљак“. Роден во Ниш во 1955 година, а почина во Ново Место, Словенија, по ненадејно влошување на неговата здравствена состојба.

Аки најголемиот дел од животот го помина како „загрепски дечко“, што беше клучно за неговото повеќедецениско влијание во музиката. Својот музички пат го започнал во тинејџерските години, настапувајќи со групите „Вакуум“, „Крвна браќа“ и „Тор“. Пресвртниот момент во неговата кариера се случил во 1975 година, кога се сретнал со Хусеин Хасанефендиќ – Хус и Јурица Паджен.

Истата година, заедно со менаџерот Владимир Михаљек – Миха, ја основале првата постава на „Парни Ваљак“, кој често бил споредуван како загрепска верзија на „Бијело дугме“. Бендот зад себе остави 16 студиски албуми, бројни хитови и милиони продадени копии, а меѓу најпознатите се „Јесен у мени“ и „Ухвати ритам“.

Аки беше татко на три деца од два брака. Со првата сопруга го има синот Кристијан, кој исто така е пејач, а со втората сопруга Ингрид – ќерката Дина. Последните години од својот живот ги помина во Словенија, каде со партнерката Барбара Весел доби уште една ќерка.

Иако роден во Ниш, Рахимовски своето детство го поминал во Скопје, каде уште од рана возраст покажувал интерес за музиката, инспириран од неговиот татко, кој бил професор по музика.

Со неговата ненадминлива енергија и карактеристичниот вокал, Аки останува симбол на „Парни Ваљак“ и музичка легенда која продолжува да инспирира генерации фанови.