Најзначајниот летен музичко-сценски фестивал „Охридско лето“ годинава се враќа во својот стандарден термин, а свеченото отворање традиционално ќе се одржи на 12 јули во Античкиот театар.

Националната опера и балет на РСМ свечено ќе го отвори 61-то издание на фестивалот „Охридско лето“, на 12 јули во Античкиот театар во Охрид, со проектот „Големиот Чајковски“. Спектакуларниот проект ќе ја донесе балетската трилогија со најубавите дела на рускиот композитор Петар Илич Чајковски, „Лебедово езеро“, „Оревокршачка“ и „Заспаната убавица“, како и извадоци од балетот „Ана Каренина“ и операта „Евгениј Онегин“.

На сцената на Античкиот театар ќе излезат повеќе од 90 уметници, предводени од балетските првенци Марија Кичевска Шокаровска, Мими Поп Алексова Атанасовска, Васил Чичијашвили и Бобан Ковачевски заедно со солистите, ансамблот и оркестарот на Националната опера и балет, под водство на диригентската палка на маестра Бисера Чадловска.

Во најавата на фестивалската програма, директорката на НУ „Охридско лето“, Наташа Поповиќ, истакна дека годинава, и покрај тоа што сѐ уште трае здравствената криза, фестивалот ќе се одржи во стандардниот фестивалски термин, од 12 јули до 20 август. Во текот на 40-те фестивалски денови предвидено е да настапат приближно 500 уметници од 18 земји, како Србија, Холандија, Словенија, Русија, Бугарија, Косово, Германија, Хрватска, Турција, Франција, Италија, Чешка, Романија, Грција, Црна Гора, Белгија и САД.

Иако се најавени врвни концерти со познати светски имиња, приоритет ќе имаат македонски уметници кои имаат светска слава, а врвни домашни изведувачи ќе настапат со светски познати имиња во „Света Софија“. Во музичката програма на фестивалот се предвидени 34 концерти со врвни уметници, од кои два ќе се одржат во рамките на офф-програмата.

Драмската програма на фестивалот годинава ќе донесе над сто театарски работници, кои ќе понудат квалитетна и атрактивна програма, составена од она што домашната продукција успеа да го создаде во специфичните пандемиски услови, како и од двете најголеми театарски куќи од Србија, Српско народно позориште од Нови Сад и Југословенско драмско позориште од Белград. Во рамките на офф-драмската програма, на трети август е предвидено да настапи познатиот српски актер Иван Босиљчиќ, кој ќе рецитира одбрани дела, а ќе долови и стихови од великанот на македонската култура, Блаже Конески, токму во годината што е прогласена за „Година на Конески“.

Целата програмата ќе се реализира според строго утврдените заштитни мерки по препорака на Комисијата за заразни болести и Министерството за здравство на РСМ, а тимот на „Охридско лето“ по минатогодишното издание е поискусен и повеќе подготвен за уште едно пандемиско издание на фестивалот.

(Текстот е објавен во „Културен печат“ број 88, во печатеното издание на „Слободен печат“ на 10-11 јули 2021)